أكيد شفتوا التدوينة السابقة : نيولوك للمدونة بمناسبة العيد!!

يسعدني أبلغ جميع اللي ما عجبهم القالب إني قررت أغيره . رجعت مرة أخرى لإستخدام قالب Garland  اللي كان لي معاه ذكريات . هذا القالب كنت ولازلت أستخدمه في مدونتي القديمة على بلوقر. وبعد تجربة القالب السابق تلقيت أكثر من إعتراض من بعض الأصدقاء اللي ما عجبهم القالب وأنا بصراحة ما كان عاجبني بعد لكني كنت مبسوط فيه لأنه أول قالب أعربه بالكامل. وإستفدت من خبرتي اللي إكتسبتها من تعريبه في تعريب هذا القالب. والحمد لله تمت العملية بنجاح وبشكل مرضي.

قالب Garland-revisited

أما بالنسبة للقالب السابق فبإذن الله بأطرح لكم النسخة المعربة منه قريباً للي حاب يستفيد منه في مدونته الخاصة أو يتعلم منه.

أول شيء كل عام وأنتم بخير وتقبل الله منا ومنكم صالح الأعمال.

ثاني شيء: أكيد لاحظتوا التغيرات . أبشركم وبحمد الله إنتهيت ولأول مرة في حياتي من تعريب قالب ووردبريس خاص فيني. طفشت من إنتظار خلق الله عشان يعربون القوالب الحلوة .

طبعا الناس طلعوا يعايدون أهلهم وقرايبهم وأنا معكتف في البيت من الساعة 11 ليلة العيد إلى الساعة 3 صباح ثاني أيام العيد (يعني أكثر بشوي من 24 ساعة ). خلال هالوقت وبالرغم من الزكمة والصداع بحمد الله إنتهيت من تعريب هذا القالب اللي أنتو شايفينه الآن. عملية التعريب كانت سهلة وبسيطة في مجملها لسببين: إن هالقالب ما فيه صور تحتاج تعديل بالفوتوشوب وإنه ما فيه سايدبار (قائمة جانبية) لأني بصراحة إلى اليوم ما أعرف كيف أنقل القائمة من اليمين إلى اليسار .

القالب مثل ما إنتو ملاحظين بسيط جدا جدا في تصميمه وشكله وهذا اللي يخليه اسرع بكثير من القالب السابق. طبعاً ما أنكر إن القالب السابق أحلى وأجمل لكن أنا بصراحة حاب أتعلم وأغثكم . وإن شاء الله إذا هالإصدار كان بدون مشاكل رح أعطيكم رابط تحميله للي عنده مدونة وحاب يجرب هالقالب الخفيف في المستقبل القريب. وأكيد طبعاً بتكون لي محاولات أخرى وقوالب جديدة إن شاء الله.

بالنسبة لرابط تحميل القالب الأصلي قبل التعديل: تلاقونه هنا. وإذا عندكم أي ملاحظة على أداء القالب أو Glitch أو Bug أو عيب مصنعي في القالب تقدرون تبلغوني من هنا. وياليت أسمع منكم رأيكم من خلال التعليقات.

تنبيه: القالب مجرب على متصفحات الفايرفوكس والقوقل كروم و أوبرا. وتأنف نفسي بل وتأبى تجربته على الإنترنت إكسبلورر. إذا طلعت لك اي مشكلة في تصفح المدونة أثناء إستخدامك للإنترنت إكسبلورر فأنا أخلي مسئوليتي تماما .

بسم الله الرحمن الرحيم وعلى بركة الله.

يوم الإثنين الموافق 17 رمضان 1430 (لو داري دشنت المدونة أول يوم من رمضان عشان اقول غرة رمضان )  والموافق يوم 7 سبتمبر 2009 (ما ضبطت لا غرة رمضان ولا غرة سبتمبر ) تم بحمد الله الإنتهاء من إعداد هذه الزاوية اللطيفة الظريفة. ولما أقول “الإنتهاء من إعداد” بس عشان تعرفون إني ما بعد بدأت التدوين .

بارك الله فيني وفي مدونتي ونفع بي وبمدونتي وبارك الله في الزوار والمعلقين والمتابعين .

كما يطيب لي ويسعدني ويشرح صدري أن أشكر كل من ساعدني ومن اقلقتهم بأسئلتي وغثيتهم بإستفساراتي وأبلشتهم بثقالة دمي وعلى رأسهم الأخت كاوائي غيرل عضوة منتدى جوريات و مجموعة أبونواف والأخ موسعن صدره (عبدالرحمن) عضو منتدى جوريات ومجموعة أبونواف والأخ ! غير البشر ! (فهد) المشرف العام على منتدى جوريات وعضو مجموعة ابونواف على تحملهم أسئلتي الغبية (دايم اللي أول مرة يتعلمون شيء تكون أسئلتهم غبية ) وعلى نصائحهم وتمنياتهم لي بالتوفيق. لا عدمتكم إن شاء الله.