لا لا مو العيد 
حبيت أهنيكم وأهني نفسي بمرور سنة حلوة وجميلة على بداية المدونة. البداية كانت 6 سبتمبر 2009 يعني زي بعد بكره 
مد يدك لا تستحي
وبمناسبة هالسنة ومناسبة العيد اللي بعد اسبوع، حبيت أغير قالب المدونة اللي للأسف صار منتشر في نص مدونات خلق الله وبالمرة نغير اللوك لشكل جديد أعرض شوي من السابق. وبهالمناسبة أحب أودع القالب القديم واقوله مع السلامه بلا رجعه إن شاء الله…القالب الجديد أصلا أحسن منك يالخايس 
(صدق إني جاحد )
القالب القديم إنتشر في كل مكان
هالقالب الجديد اللي أنتم شايفينه طبعا كان الخامس في قائمة قوالب كثيرة إشتغلت عليها الأسبوع الماضي وعربت بعضها وغيرت من بعضها لحد ما رسيت على هالقالب الجديد بعد إستشارة طاقم الإدارة في منتدى جوريات الله يخليهم لي ترى بغيت أحط قالب أسود بس هم اللي أقنعوني إنه لون شين مع إني أحب هاللون. عموما اللي نفسه في قالب معرب أسود يقولي وأنا أرفعه للمدونة للجميع. (هذا رابطه بالمناسبة للي حاب يطلع عليه قبل التعريب)
وبهالمناسبة أيضا حبيت اشكر كل من زار المدونة سواء علق على المواضيع أو ما علق. وأحب أشكر كل من حط رابط لمدونتي أو مواضيعي في موقعه أو في تويته في تويتر أو فيس بوك أو غيره وخصوصا أبو نواف (هو ما غيره صاحب شبكة أبو نواف 
) والزائرة الدائمة فاتن (تونا جاوية بالنكهة اليابانية) وأهنيها بعد بمناسبة مرور سنة على مدونتها . أصلا نص الزوار اللي يجون للمدونة وصلوا من تويتات أبو نواف وفاتن . شكري لهم نابع من قلبي بنسبة 95% والباقي تمصلح وتلزق عشان ينشرون مدونتي أكثر
ولا أنسى أشكر مشرفي جوريات Noorea على تصميم اللوقو الخاص بالمدونة و MeMoo على تصميم أيقونات شبكة ابو نواف وجوريات اللي على اليسار
أحبك يا قوقل وأحب خدماتك الحلوة
حتى الآن أكبر عدد من الزوار في يوم واحد كان 380 زائر يوم 8 يوليو 2010 بعد موضوع اللحسة (كيف تصور نفسك وأنت تصور نفسك لما تصور نفسك؟؟؟) واللي أعتبره البداية الفعلية لنشاطي في المدونة وبداية إنتشار المدونة خصوصا بعد تويتة أبو نواف عن الموضوع . حتى الآن بلغ عدد التدوينات (او المواضيع بالأحرى) 77 تدوينة في 21 تصنيف وبمجموع 178 تعليق. وإن شاء الله أستمر معاكم للأفضل واقدر أرسم البسمة على شفاهكم في كل زيارة (ولو إني أحيانا أمصخها واجيب اشياء يمكن ما تعجبكم ).
تحياتي
